«Буряад хэлэндээ hонирхол түрүүлхэ» гэhэн түлэблэлэй нээлгын hайндэр
Росси гүрэнэй Юрэнхылэгшын фондын hомолhон мүнгѳѳр Υбэр Байгалай хизаарай буряад хэлэнэй багшанарай Ассоциациин эмхидхэhэн «Буряад хэлэндээ hонирхол түрүүлхэ» гэhэн түлэблэлэй нээлгын hайндэр февралиин 9-дэ Агын Ц.Жамцараногой нэрэмжэтэ номой сангай танхим соо олоной хабаадалгатайгаар үнгэрѳѳ.
Түлэблэлэй гол зорилго хадаа үхибүүдые түрэл хэлэндэнь эльгэлүүлхэ, hонирхуулха, хоорондоо буряадаараа хөөрэлдэхэ, харилсаха эрмэлзэл түрүүлхэ болон арадайнгаа түүхэ, соёл, ёһо заншалнуудтай танилсуулха болоно.
Түлэблэл байгша оной февраль hараhаа июль болотор ябуулагдаха. Гол шэглэлынь буряад хэлэеэ мэдэхэгүй үхибүүдтэ зорюулагдана. Хэшээлнүүд онлайн болон оффлайн аргаар ябуулагдаха. Хэшээлнүүд долоон хоногой хоёр дахин Ц.Жамцараногой нэрэмжэтэ номой сан болон багшанарай мэргэжэл дээшэлүүлгын институдай танхимууд соо үгэргэгдэдэг байха. Хэшээлнүүдhээ гадна хүүгэдэй хоорондо hонирхолтой мүрысѳѳнүүд, викторина, челлендж гэхэ мэтэ хэмжээ ябуулганүүд үнгэргэгдэхэ. Социальна сетьнүүд болон Ютуб канал соо хүүгэдэй ажалнууд табигдаха.
Гэртэхин болон үхибүүд hонирхон яhала олоороо бэшүүлбэ. Хамта дээрээ 100 гаран зон бэшүүлээд байна. Тэдэнэй дунда оюутад, залуу гэртэхиншье бии. Энэнь тон hайшаалтай.
Хүрьһэтэ алтан дэлхэй дээрэ
Хүнэй бэе оложо,
Буряад хүн түрөө хадаа,
Элинсэг хулинсагуудайнгаа
Эльгэлэн, энхэрэн абажа ябаһан
Эхэ түрэл буряад хэлэеэ
Эдэбхитэй саашан дамжуулха
Энэл даа хүн бүхэнэй нангин уялга.
